Newsline II - Reloaded Joomla News Portal

Binati na ni outgoing President Gloria Arroyo si President-Elect Noynoy Aquino.

Kinumpirma ng kauna-unahang binatang pangulo na tinawagan ito ni Ginang Arroyo at tumagal lamang ng hanggang limang minuto ang kanilang pag-uusap.

Hindi naman binanggit ni Aquino kung kailan at anong oras sila nag-usap ng papaalis na pangulo.

Ayon  naman  kay  Press  Secretary  Crispulo  Icban,  nangyari  ang  pag-uusap  kaninang  umaga,  pagdating ng pangulo mula  sa World Expo sa Shanghai,  China

Bukod sa tawag sa telepono, nagpaabot din ng pagbati si Ginang Arroyo kina Aquino at Vice Presidential-Elect Jejomar Binay sa pamamagitan ng advertisement sa ilang pahayagan.

Nanawagan din ang outgoing president sa mga Filipino na suportahan ang mga bagong lider ng bansa.

Samantala, walang  nakikitang  dahilan  ang  Malakanyang  na  makipag-usap  sa  administrasyong  Aquino  para  sa  rekonsilyasyon.

Iginiit  ni  Presidential  Spokesman  Ricardo  Saludo  na  wala silang  ginagawang  masama  sa  kampo  ni  President-Elect  Noynoy  Aquino  o  kahit kanino kaya’t  wala  silang  dapat ihingi  ng  tawad.

Hindi  rin  naniniwala  ang  palasyo  na  kaaway  ang  turing  ni Aquino  kay  Pangulong  Arroyo.

Ayon  kay  Saludo,  si  Aquino  mismo  ang  nagsabi  na  mahalaga  ngayon  ang  pagkakaisa  at  pagsulong  ng  bansa sa  halip  na  maghamon ng away.