Newsline II - Reloaded Joomla News Portal

Sinubpoena na ng Senado si Ombudsman Conchita Carpio Morales at apat na iba pa na tinukoy ng defense panel kahapon na ipatawag ng impeachment court

Sa subpoena na pinirmahan ni Senate President Juan Ponce Enrile bilang presiding officer ng impeachment court, inatasan nito si Morales na dalhin ang lahat ng dokumento sa tinanggap nitong reklamo kaugnay sa umano’y 10 million dollar accounts ni Chief Justice Renato Corona.

Kasama ni Morales na pinahaharap sa Lunes, sina Congressman Walden Bello,  Dating Akbayan Party List  Rep. Risa Hontiveros,  Harvey Keh  at Emmanuel Tiu Santos.

Ang apat ay pawang petitioners sa mga kaso na isinampa laban sa punong mahistrado sa Office of the Ombudsman.

Pinadadala naman sa apat ang original copies ng kanilang reklamo laban kay Corona.

Sa kabuuan ay sampu ang hiniling ng depensa na isubpoena ng impeachment court subalit hindi na ipatatawag ang anim dahil susuportahan lamang nila ang magiging testimonya ng apat.

Ang anim ay sina Ruperto Alerosa, Gibby Gorres, Albert Concepcion,  Ernest Calayag,  Moises Albiento at Tristan Zinampan.